Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. avertens faciem “procul a! procul omina” dixit
  2. “talia di pellant! Multoque ego iustius aevum
  3. exsul agam, quam me videant Capitolia regem!”
  4. Dixit et extemplo populumque gravemque senatum
  5. convocat, ante tamen pacali cornua lauro
  6. velat; et aggeribus factis a milite forti
  7. insistit priscosque deos e more precatus
  8. “est” ait “hic unus, quem vos nisi pellitis urbe,
  9. rex erit. Is qui sit, signo, non nomine dicam:
  10. cornua fronte gerit. Quem vobis indicat augur,
  11. si Romam intrarit, famularia iura daturum.
  12. Ille quidem potuit portas inrumpere apertas,
  13. sed nos obstitimus, quamvis coniunctior illo
  14. nemo mihi est. Vos urbe virum prohibete, Quirites,
  15. vel, si dignus erit, gravibus vincite catenis,
  16. aut finite metum fatalis morte tyranni!”
  17. Qualia succinctis, ubi trux insibilat eurus,
  18. murmura pinetis fiunt, aut qualia fluctus
  19. aequorei faciunt, siquis procul audiat illos,
  20. tale sonat populus; sed per confusa frementis