Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. addidit obscenis convicia rustica dictis,
  2. nec prius os tacuit, quam guttura condidit arbor:
  3. arbore enim sucoque licet cognoscere mores;
  4. quippe notam linguae bacis oleaster amaris
  5. exhibet: asperitas verborum cessit in illas.
  6. Hinc ubi legati rediere, negata ferentes
  7. arma Aetola sibi, Rutuli sine viribus illis
  8. bella instructa gerunt, multumque ab utraque cruoris
  9. parte datur; fert ecce avidas in pinea Turnus
  10. texta faces, ignesque timent, quibus unda pepercit.
  11. Iamque picem et ceras alimentaque cetera flammae
  12. Mulciber urebat perque altum ad carbasa malum
  13. ibat, et incurvae fumabant transtra carinae:
  14. cum memor has pinus Idaeo vertice caesas
  15. sancta deum genetrix tinnitibus aera pulsi
  16. aeris et inflati complevit murmure buxi,
  17. perque leves domitis invecta leonibus auras
  18. “inrita sacrilega iactas incendia dextra,
  19. Turne!” ait. “Eripiam, nec me patiente cremabit
  20. ignis edax nemorum partes et membra meorum.”