Metamorphoses
Ovid
Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.
- murmur et in terram toto procumbere vultu;
- osque meum sensi pando occallescere rostro,
- colla tumere toris, et qua modo pocula parte
- sumpta mihi fuerant, illa vestigia feci,
- cumque eadem passis (tantum medicamina possunt!)
- claudor hara, solumque suis caruisse figura
- vidimus Eurylochum: solus data pocula fugit.
- Quae nisi vitasset, pecoris pars una manerem
- nunc quoque saetigeri, nec tantae cladis ab illo
- certior ad Circen ultor venisset Ulixes.
- Pacifer huic dederat florem Cyllenius album,
- moly vocant superi, nigra radice tenetur;
- tutus eo monitisque simul caelestibus intrat
- ille domum Circes, et ad insidiosa vocatus
- pocula, conantem virga mulcere capillos
- reppulit et stricto pavidam deterruit ense.
- Inde fides dextraeque datae, thalamoque receptus
- coniugii dotem sociorum corpora poscit.
- Spargimur ignotae sucis melioribus herbae
- percutimurque caput conversae verbere virgae,