Amores
Ovid
Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.
- Seu pendent nivea pulli cervice capilli,
- Leda fuit nigra conspicienda coma;
- Seu flavent, placuit croceis Aurora capillis.
- Omnibus historiis se meus aptat amor.
- Me nova sollicitat, me tangit serior aetas;
- Haec melior, specie corporis illa placet.
- Denique quas tota quisquam probet urbe puellas,
- Noster in has omnis ambitiosus amor.
- Nullus amor tanti est — abeas, pharetrate Cupido! —
- Ut mihi sint totiens maxima vota mori.
- Vota mori mea sunt, cum te peccasse recordor,
- O mihi perpetuum nata puella malum!
- Non male deletae nudant tua facta tabellae,
- Nec data furtive munera crimen habent.
- O utinam arguerem sic, ut non vincere possem!
- Me miserum! quare tam bona causa mea est?
- Felix, qui quod amat defendere fortiter audet,
- Cui sua 'non feci!' dicere amica potest.
- Ferreus est nimiumque suo favet ille dolori,
- Cui petitur victa palma cruenta rea.