Civil War

Lucan

Lucan. M.Annaei Lucani Pharsaliae Libri X. Weisse, Karl Hermann, editor. Leipzig: G. Bassus, 1835.

  1. Iussit signa rapi propere Cato: discere nulli
  2. Permissum est, hoc posse sitim. Sed tristior illa
  3. Mors erat ante oculos: miserique in crure Sabelli
  4. Seps stetit exiguus, quem flexo dente tenacem
  5. Avulsitque manu, piloque adfixit arenis:
  6. Parva modo serpens; sed qua non ulla cruentae
  7. Tantum mortis habet. Nam plagae proxima circum
  8. Fugit rapta cutis, pallentiaque ossa retexit.
  9. Iamque sinu laxo nudum est sine corpore vulnus;
  10. Membra natant sanie: surae fluxere: sine ullo
  11. Tegmine poples erat: femorum quoque musculus omni
  12. Liquitur, et nigra distillant inguina tabe.
  13. Dissiluit stringens uterum membrana, fluuntque
  14. Viscera: nec, quantum toto de corpore debet,
  15. Effluit in terras: saevum sed membra venenum
  16. Decoquit; in minimum mox contrahit omnia virus
  17. Vincula nervorum, et laterum contexta, cavumque
  18. Pectus, et abstrusum fibris vitalibus, omne
  19. Quidquid homo est, aperit pestis. Natura profana
  20. Morte patet: manant humeri fortesque lacerti: