Civil War

Lucan

Lucan. M.Annaei Lucani Pharsaliae Libri X. Weisse, Karl Hermann, editor. Leipzig: G. Bassus, 1835.

  1. Regem noctis ames, quae te contagia passam
  2. Noluerit revocare parens. Tibi, pessime mundi
  3. Arbiter, immittam ruptis Titana cavernis,
  4. Et subito feriere die. Paretis? an ille
  5. Compellandus erit, quo numquam terra vocato
  6. Non concussa tremit, qui Gorgona cernit apertam,
  7. Verberibusque suis trepidam castigat Erinnyn,
  8. Indespecta tenet vobis qui Tartara; cuius
  9. Vos estis, superi; Stygias qui peierat undas?
  10. Protinus adstrictus caluit cruor, atraque fovit
  11. Vulnera, et in venas extremaque membra cucurrit.
  12. Percussae gelido trepidant sub pectore fibrae:
  13. Et nova desuetis subrepens vita medullis
  14. Miscetur morti. Tunc omnis palpitat artus:
  15. Tenduntur nervi: nec se tellure cadaver
  16. Paulatim per membra levat, terraque repulsum est,
  17. Erectumque simul. Distento lumina rictu
  18. Nudantur. Nondum facies viventis in illo,
  19. Iam morientis erat. Remanent pallorque rigorque;
  20. Et stupet illatus mundo. Sed murmure nullo