Civil War

Lucan

Lucan. M.Annaei Lucani Pharsaliae Libri X. Weisse, Karl Hermann, editor. Leipzig: G. Bassus, 1835.

  1. Atra nec exiguo stillant sudantia rore,
  2. Aut impulsa levi turbatur glarea vena.
  3. Tunc exhausta super multo sudore iuventus
  4. Extrahitur, duris silicum lassata metallis.
  5. Quoque minus possent siccos tolerare vapores,
  6. Quaesitae fecistis aquae. Nec languida fessi
  7. Corpora sustentant epulis, mensasque perosi
  8. Auxilium fecere famem. Si mollius arvum
  9. Prodidit humorem, pingues manus utraque glebas
  10. Exprimit ora super. Nigro si turbida limo
  11. Colluvies immota iacet, cadit omnis in haustus
  12. Certatim obscoenos miles: moriensque recepit,
  13. Quas nollet victurus, aquas: rituque ferarum
  14. Distentas siccant pecudes, et lacte negato,
  15. Sordidus exhausto sorbetur ab ubere sanguis.
  16. tunc herbas frondesque terunt, et rore madentes
  17. Destringunt ramos: ac si quos palmite crudo
  18. Arboris aut tenera succos pressere medulla.
  19. O fortunati, fugiens quos barbarus hostis
  20. Fontibus immixto stravit per rura veneno.