Civil War
Lucan
Lucan. M.Annaei Lucani Pharsaliae Libri X. Weisse, Karl Hermann, editor. Leipzig: G. Bassus, 1835.
- Proventu scelerum quaerunt, uter imperet Urbi?
- Vix tanti fuerat, civilia bella movere,
- Ut neuter. Tales pietas peritura querelas
- Egerit. At miseros angit sua cura parentes,
- Oderuntque gravis vivacia fata senectae,
- Servatosque iterum bellis civilibus annos.
- Atque aliquis, magno quaerens exempla timori,
- Non alios, inquit, motus tunc fata parabant,
- Cum post Teutonicos victor Libycosque triumphos
- Exsul limosa Marius caput abdidit ulva.
- Stagna udi texere soli laxaeque paludes
- Depositum, Fortuna, tuum: mox vincula ferri
- Exedere senem, longusque in carcere paedor.
- Consul e eversa felix moriturus in Urbe
- Poenas ante dabat scelerum. Mors ipsa refugit
- Saepe virum, frustraque hosti concessa potestas
- Sanguinis invisi: primo qui caedis in ictu
- Diriguit, ferrumque manu torpente remisit.
- Viderat immensum tenebroso in carcere lumen
- Terribilesque deas scelerum, Mariumque futurum;