Civil War

Lucan

Lucan. M.Annaei Lucani Pharsaliae Libri X. Weisse, Karl Hermann, editor. Leipzig: G. Bassus, 1835.

  1. Persarum Euphraten, Indorum sanguine Gangen:
  2. Terrarum fatale malum, fulmenque, quod omnes
  3. Percuteret pariter populos, et sidus inicum
  4. Gentibus. Oceano classes inferre parabat
  5. Exteriore mari. Non illi flamma, nec undae,
  6. Nec sterilis Libye, nec Syrticus obstitit Ammon.
  7. Isset in occasus, mundi devexa secutus,
  8. Ambissetque polos, Nilumque a fonte bibisset:
  9. Occurrit suprema dies, naturaque solum
  10. Hunc potuit finem vesano ponere regi;
  11. Qui secum invidia, qua totum ceperat orbem,
  12. Abstulit imperium; nulloque herede relicto
  13. Totius fati, lacerandas praebuit urbes.
  14. Sed cecidit, Babylone sua Parthoque verendus.
  15. Pro pudor! Eoi propius timuere sarissas,
  16. Quam nunc pila timent, populi. Licet usque sub Arcton
  17. Regnemus, Zephyrique domos terrasque premamus
  18. Flagrantis post terga Noti: cedemus in ortus
  19. Arsacidum domino. Non felix Parthia Crassis
  20. Exiguae secura fuit provincia Pellae.