Ab urbe condita

et Ap. Claudius felicitatem virtutemque collegae in Liguribus Ingaunis aequavit secundis aliquot proeliis. sex praeterea oppida eorum expugnavit; multa milia hominum in iis cepit; belli auctores tres et quadraginta securi percussit. comitiorum appetebat tempus.

prior tamen Claudius quam Sempronius, cui sors comitia habendi obtigerat, Romam venit, quia . Claudius frater eius consulatum petebat.

competitores habebat patricios L. Aemilium Q. Fabium Ser. Sulpicium Galbam, veteres candidatos, et ab repulsis eo magis debitum, quia primo negatus erat, honorem repetentes.

etiam quia plus

plebeii quoque gratiosi homines petebant, L. Porcius Q. Terentius Culleo Cn. Baebius Tamphilus, et hi repulsis in spem impetrandi tandem aliquando honoris dilati.

Claudius ex omnibus unus novus candidatus erat. opinione hominum haud dubie destinabantur Q. Fabius Labeo et L. Porcius Licinus.

sed Claudius consul sine lictoribus cum fratre toto foro volitando,

clamitantibus adversariis et maiore parte senatus, meminisse eum debere se prius consulem populi Romani quam fratrem . Claudii esse: quin ille sedens pro tribunali aut arbitrum tacitum spectatorem comitiorum se praeberet? — coerceri tamen ab effuso studio nequit.

magnis contentionibus tribunorum quoque plebis, qui contra consulem pro studio eius pugnabant, comitia aliquotiens turbata, donec pervicit Appius, ut deiecto Fabio fratrem traheret.

creatus Claudius Pulcher praeter spem suam et ceterorum. locum suum tenuit L. Porcius Licinus, quia moderatis studiis, non vi Claudiana inter plebeios certatum est.