Satires

Horace

Horace. The Works of Horace. Vol. II. Smart, Christopher, editor. Philadelphia: J. Whetham, 1836.

  1. quid iuvat inmensum te argenti pondus et auri
  2. furtim defossa timidum deponere terra?
  3. quod, si conminuas, vilem redigatur ad assem?
  4. at ni id fit, quid habet pulcri constructus acervus?
  5. milia frumenti tua triverit area centum:
  6. non tuus hoc capiet venter plus ac meus: ut, si
  7. reticulum panis venalis inter onusto
  8. forte vehas umero, nihilo plus accipias quam
  9. qui nil portarit. vel dic quid referat intra
  10. naturae finis viventi, iugera centum an
  11. mille aret? ‘at suave est ex magno tollere acervo.’
  12. dum ex parvo nobis tantundem haurire relinquas,
  13. cur tua plus laudes cumeris granaria nostris?
  14. ut tibi si sit opus liquidi non amplius urna
  15. vel cyatho ac dicas ‘magno de flumine mallem
  16. quam ex hoc fonticulo tantundem sumere.’ eo fit,
  17. plenior ut siquos delectet copia iusto,
  18. cum ripa simul avolsos ferat Aufidus acer.
  19. at qui tantuli eget quanto est opus, is neque limo
  20. turbatam haurit aquam neque vitam amittit in undis.