Epodi

Horace

Horace. Q. Horati Flacci Carmina. Vollmer, Friedrich, editor. Leipzig: Teubner, 1912.

  1. “Iam iam efficaci do manus scientiae,
  2. supplex et oro regna per Proserpinae,
  3. per et Dianae non movenda numina,
  4. per atque libros carminum valentium
  5. refixa caelo devocare sidera,
  6. Canidia: parce vocibus tandem sacris
  7. citumque retro solve, solve turbinem.
  8. movit nepotem Telephus Nereium,
  9. in quem superbus ordinarat agmina
  10. Mysorum et in quem tela acuta torserat.
  11. unxere matres Iliae additum feris
  12. alitibus atque canibus homicidam Hectorem,
  13. postquam relictis moenibus rex procidit
  14. heu pervicacis ad pedes Achillei.
  15. saetosa duris exuere pellibus
  16. laboriosi remiges Vlixei
  17. volente Circa membra; tunc mens et sonus
  18. relapsus atque notus in voltus honor.
  19. dedi satis superque poenarum tibi,
  20. amata nautis multum et institoribus.