Epodi

Horace

Horace. Q. Horati Flacci Carmina. Vollmer, Friedrich, editor. Leipzig: Teubner, 1912.

  1. et tu, quicumque es felicior atque meo nunc
  2. superbus incedis malo,
  3. sis pecore et multa dives tellure licebit
  4. tibique Pactolus fluat
  5. nec te Pythagorae fallant arcana renati
  6. formaque vincas Nirea,
  7. heu heu, translatos alio maerebis amores,
  8. ast ego vicissim risero.
  1. Altera iam teritur bellis civilibus aetas,
  2. suis et ipsa Roma viribus ruit.
  3. quam neque finitimi valuerunt perdere Marsi
  4. minacis aut Etrusca Porsenae manus,
  5. aemula nec virtus Capuae nec Spartacus acer
  6. novisque rebus infidelis Allobrox
  7. nec fera caerulea domuit Germania pube
  8. parentibusque abominatus Hannibal: