Odes

Horace

Horace, Odes and Epodes. Shorey, Paul,editor; Laing, Gordon Jennings, joint editor. Chicago: B.H. Sanborn and Company, 1919.

  • dulce et decorum est pro patria mori:
  • mors et fugacem persequitur virum
  • nec parcit inbellis iuventae
  • poplitibus timidoque tergo.
  • Virtus, repulsae nescia sordidae,
  • intaminatis fulget honoribus
  • nec sumit aut ponit securis
  • arbitrio popularis aurae.
  • Virtus, recludens inmeritis mori
  • caelum, negata temptat iter via
  • coetusque volgaris et udam
  • spernit humum fugiente penna.
  • est et fideli tuta silentio
  • merces: vetabo, qui Cereris sacrum
  • volgarit arcanae, sub isdem
  • sit trabibus fragilemque mecum
  • solvat phaselon; saepe Diespiter
  • neglectus incesto addidit integrum,
  • raro antecedentem scelestum
  • deseruit pede Poena claudo.