Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. auctorem nec quo se ardens inmittere possit.
  2. Tu tamen interea calido mihi sanguine poenas
  3. persolves amborum, inquit; simul ense recluso
  4. ibat in Euryalum. Tum vero exterritus, amens
  5. conclamat Nisus, nec se celare tenebris
  6. amplius aut tantum potuit perferre dolorem.
  7. Me me, adsum qui feci, in me convertite ferrum,
  8. O Rutuli, mea fraus omnis; nihil iste nec ausus
  9. nec potuit, caelum hoc et conscia sidera testor,
  10. tantum infelicem nimium dilexit amicum.
  11. Talia dicta dabat; sed viribus ensis adactus
  12. transabiit costas et candida pectora rumpit.
  13. Volvitur Euryalus leto, pulchrosque per artus
  14. it cruor, inque umeros cervix conlapsa recumbit:
  15. purpureus veluti cum flos succisus aratro
  16. languescit moriens lassove papavera collo
  17. demisere caput, pluvia cum forte gravantur.
  18. At Nisus ruit in medios solumque per omnis
  19. Volcentem petit in solo Volcente moratur.
  20. Quem circum glomerati hostes hinc comminus atque hinc