Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Nec satis: extremas Corythi penetravit ad urbes
  2. Lydorumque manum collectos armat agrestis.
  3. Quid dubitas? Nunc tempus equos, nunc poscere currus.
  4. Rumpe moras omnis et turbata arripe castra.
  5. Dixit et in caelum paribus se sustulit alis
  6. ingentemque fuga secuit sub nubibus arcum.
  7. Adgnovit iuvenis duplicisque ad sidera palmas
  8. sustulit ac tali fugientem est voce secutus:
  9. Iri, decus caeli, quis te mihi nubibus actam
  10. detulit in terras? Unde haec tam clara repente
  11. tempestas? Medium video discedere caelum
  12. palantisque polo stellas. Sequor omina tanta,
  13. quisquis in arma vocas. Et sic effatus ad undam
  14. processit summoque hausit de gurgite lymphas,
  15. multa deos orans, oneravitque aethera votis.
  16. Iamque omnis campis exercitus ibat apertis,
  17. dives equum, dives pictaï vestis et auri;
  18. Messapus primas acies, postrema coercent
  19. Tyrrhidae iuvenes, medio dux agmine Turnus,
  20. vertitur arma tenens et toto vertice supra est.