Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. arma acri facienda viro. Nunc viribus usus,
  2. nunc manibus rapidis, omni nunc arte magistra.
  3. Praecipitate moras. Nec plura effatus; at illi
  4. ocius incubuere omnes pariterque laborem
  5. sortiti. Fluit aes rivis aurique metallum,
  6. volnificusque chalybs vasta fornace liquescit.
  7. Ingentum clipeum informant, unum omnia contra
  8. tela Latinorum, septenosque orbibus orbes
  9. impediunt. Alii ventosis follibus auras
  10. accipiunt redduntque, alii stridentia tingunt
  11. aera lacu. Gemit impositis incudibus antrum.
  12. Illi inter sese multa vi bracchia tollunt
  13. in numerum versantque tenaci forcipe massam.
  14. Haec pater Aeoliis properat dum Lemnius oris,
  15. Euandrum ex humili tecto lux suscitat alma
  16. et matutini volucrum sub culmine cantus.
  17. Consurgit senior tunicaque inducitur artus
  18. et Tyrrhena pedum circumdat vincula plantis;
  19. tum lateri atque umeris Tegeaeum subligat ensem,
  20. demissa ab laeva pantherae terga retorquens.