Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. ostentans artemque pater arcumque sonantem.
  2. Hic oculis subito obicitur magnoque futurum
  3. augurio monstrum; docuit post exitus ingens,
  4. seraque terrifici cecinerunt omina vates.
  5. Namque volans liquidis in nubibus arsit harundo,
  6. signavitque viam flammis, tenuisque recessit
  7. consumpta in ventos, caelo ceu saepe refixa
  8. transcurrunt crinemque volantia sidera ducunt.
  9. Attonitis haesere animis, superosque precati
  10. Trinacrii Teucrique viri; nec maximus omen
  11. abnuit Aeneas; sed laetum amplexus Acesten
  12. muneribus cumulat magnis, ac talia fatur:
  13. Sume, pater; nam te voluit rex magnus Olympi
  14. talibus auspiciis exsortem ducere honores.
  15. Ipsius Anchisae longaevi hoc munus habebis,
  16. cratera impressum signis, quem Thracius olim
  17. Anchisae genitori in magno munere Cisseus
  18. ferre sui dederat monumentum et pignus amoris.
  19. Sic fatus cingit viridanti tempora lauro,
  20. et primum ante omnes victorem appellat Acesten.