Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Tum pater Aeneas procedere longius iras
  2. et saevire animis Entellum haud passus acerbis;
  3. sed finem imposuit pugnae, fessumque Dareta
  4. eripuit mulcens dictis, ac talia fatur:
  5. Infelix, quae tanta animum dementia cepit?
  6. Non vires alias conversaque numina sentis?
  7. Cede deo. Dixitque et proelia voce diremit.
  8. Ast illum fidi aequales, genua aegra trahentem,
  9. iactantemque utroque caput, crassumque cruorem
  10. ore eiectantem mixtosque in sanguine dentes,
  11. ducunt ad naves; galeamque ensemque vocati
  12. accipiunt; palmam Entello taurumque relinquunt.
  13. Hic victor, superans animis tauroque superbus:
  14. Nate dea, vosque haec inquit cognoscite, Teucri,
  15. et mihi quae fuerint iuvenali in corpore vires,
  16. et qua servetis revocatum a morte Dareta.
  17. Dixit, et adversi contra stetit ora iuvenci,
  18. qui donum adstabat pugnae, durosque reducta
  19. libravit dextra media inter cornua caestus,
  20. arduus, effractoque inlisit in ossa cerebro.