Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Nec nos obniti contra, nec tendere tantum
  2. sufficimus. Superat quoniam Fortuna, sequamur,
  3. quoque vocat, vertamus iter. Nec litora longe
  4. fida reor fraterna Erycis portusque Sicanos,
  5. si modo rite memor servata remetior astra.
  6. Tum pius Aeneas: Equidem sic poscere ventos
  7. iamdudum et frustra cerno te tendere contra:
  8. Flecte viam velis. An sit mihi gratior ulla,
  9. quove magis fessas optem demittere naves,
  10. quam quae Dardanium tellus mihi servat Acesten,
  11. et patris Anchisae gremio complectitur ossa?
  12. Haec ubi dicta, petunt portus, et vela secundi
  13. intendunt Zephyri; fertur cita gurgite classis,
  14. et tandem laeti notae advertuntur harenae.
  15. At procul ex celso miratus vertice montis
  16. adventum sociasque rates occurrit Acestes,
  17. horridus in iaculis et pelle Libystidis ursae,
  18. Troïa Criniso conceptum flumine mater
  19. quem genuit: veterum non immemor ille parentum
  20. gratatur reduces, et gaza laetus agresti