Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Sed fugite, O miseri, fugite, atque ab litore funem
  2. rumpite.
  3. Nam qualis quantusque cavo Polyphemus in antro
  4. lanigeras claudit pecudes atque ubera pressat,
  5. centum alii curva haec habitant ad litora volgo
  6. infandi Cyclopes, et altis montibus errant.
  7. Tertia iam lunae se cornua lumine complent,
  8. cum vitam in silvis inter deserta ferarum
  9. lustra domosque traho, vastosque ab rupe Cyclopas
  10. prospicio, sonitumque pedum vocemque tremesco.
  11. Victum infelicem, bacas lapidosaque corna,
  12. dant rami et volsis pascunt radicibus herbae.
  13. Omnia conlustrans, hanc primum ad litora classem
  14. conspexi venientem. Huic me, quaecumque fuisset,
  15. addixi: satis est gentem effugisse nefandam.
  16. Vos animam hanc potius quocumque absumite leto.
  17. Vix ea fatus erat, summo cum monte videmus
  18. ipsum inter pecudes vasta se mole moventem
  19. pastorem Polyphemum et litora nota petentem,
  20. monstrum horrendum, informe, ingens, cui lumen ademptum.