Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. hos Helenus scopulos, haec saxa horrenda canebat.
  2. Eripite, O socii, pariterque insurgite remis!
  3. Haud minus ac iussi faciunt, primusque rudentem
  4. contorsit laevas proram Palinurus ad undas.
  5. laevam cuncta cohors remis ventisque petivit.
  6. Tollimur in caelum curvato gurgite, et idem
  7. subducta ad Manis imos desedimus unda.
  8. Ter scopuli clamorem inter cava saxa dedere:
  9. ter spumam elisam et rorantia vidimus astra.
  10. Interea fessos ventus cum sole reliquit,
  11. ignarique viae Cyclopum adlabimur oris.
  12. Portus ab accessu ventorum immotus et ingens
  13. ipse; sed horrificis iuxta tonat Aetna ruinis;
  14. interdumque atram prorumpit ad aethera nubem,
  15. turbine fumantem piceo et candente favilla,
  16. attollitque globos flammarum et sidera lambit;
  17. interdum scopulos avolsaque viscera montis
  18. erigit eructans, liquefactaque saxa sub auras
  19. cum gemitu glomerat, fundoque exaestuat imo.
  20. Fama est Enceladi semustum fulmine corpus