Aeneid
Virgil
Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.
- Quem non incusavi amens hominumque deorumque,
- aut quid in eversa vidi crudelius urbe?
- Ascanium Anchisenque patrem Teucrosque Penatis
- commendo sociis et curva valle recondo;
- ipse urbem repeto et cingor fulgentibus armis.
- Stat casus renovare omnis, omnemque reverti
- per Troiam, et rursus caput obiectare periclis.
- Principio muros obscuraque limina portae,
- qua gressum extuleram, repeto, et vestigia retro
- observata sequor per noctem et lumine lustro.
- Horror ubique animo, simul ipsa silentia terrent.
- Inde domum, si forte pedem, si forte tulisset,
- me refero: inruerant Danai, et tectum omne tenebant.
- Ilicet ignis edax summa ad fastigia vento
- volvitur; exsuperant flammae, furit aestus ad auras.
- Procedo et Priami sedes arcemque reviso.
- Et iam porticibus vacuis Iunonis asylo
- custodes lecti Phoenix et dirus Ulixes
- praedam adservabant. Huc undique Troia gaza
- incensis erepta adytis, mensaeque deorum,