Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Nos abiisse rati et vento petiisse Mycenas:
  2. ergo omnis longo solvit se Teucria luctu;
  3. panduntur portae; iuvat ire et Dorica castra
  4. desertosque videre locos litusque relictum.
  5. Hic Dolopum manus, hic saevus tendebat Achilles;
  6. classibus hic locus; hic acie certare solebant.
  7. Pars stupet innuptae donum exitiale Minervae,
  8. et molem mirantur equi; primusque Thymoetes
  9. duci intra muros hortatur et arce locari,
  10. sive dolo, seu iam Troiae sic fata ferebant.
  11. At Capys, et quorum melior sententia menti,
  12. aut pelago Danaum insidias suspectaque dona
  13. praecipitare iubent, subiectisque urere flammis,
  14. aut terebrare cavas uteri et temptare latebras.
  15. Scinditur incertum studia in contraria volgus.
  16. Primus ibi ante omnis, magna comitante caterva,
  17. Laocoön ardens summa decurrit ab arce,
  18. et procul: O miseri, quae tanta insania, cives?
  19. Creditis avectos hostis? Aut ulla putatis
  20. dona carere dolis Danaum? Sic notus Ulixes?