Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Occidit infelix nostrum ne dedecus Ufens
  2. adspiceret; Teucri potiuntur corpore et armis.
  3. Exscindine domos (id rebus defuit unum)
  4. perpetiar, dextra nec Drancis dicta refellam?
  5. Terga dabo et Turnum fugientem haec terra videbit?
  6. Usque adeone mori miserum est? Vos O mihi Manes
  7. este boni, quoniam superis aversa voluntas!
  8. Sancta ad vos anima atque istius nescia culpae
  9. descendam, magnorum haud umquam indignus avorum.
  10. Vix ea fatus erat: medios volat ecce per hostis
  11. vectus equo spumante Saces, adversa sagitta
  12. saucius ora, ruitque implorans nomine Turnum:
  13. Turne, in te suprema salus: miserere tuorum.
  14. Fulminat Aeneas armis summasque minatur
  15. deiecturum arces Italum exscidioque daturum;
  16. iamque faces ad tecta volant. In te ora Latini,
  17. in te oculos referunt; mussat rex ipse Latinus,
  18. quos generos vocet aut quae sese ad foedera flectat.
  19. Praeterea regina, tui fidissima, dextra
  20. occidit ipsa sua lucemque exterrita fugit.