Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Tango aras, medios ignis et numina testor:
  2. nulla dies pacem hanc Italis nec foedera rumpet,
  3. quo res cumque cadent; nec me vis ulla volentem
  4. avertet, non, si tellurem effundat in undas
  5. diluvio miscens caelumque in Tartara solvat;
  6. ut sceptrum hoc (dextra sceptrum nam forte gerebat)
  7. numquam fronde levi fundet virgulta nec umbras,
  8. cum semel in silvis imo de stirpe recisum
  9. matre caret posuitque comas et bracchia ferro,
  10. olim arbos, nunc artificis manus aere decoro
  11. inclusit patribusque dedit Latinis.
  12. Talibus inter se firmabant foedera dictis
  13. conspectu in medio procerum. Tum rite sacratas
  14. in flammam iugulant pecudes et viscera vivis
  15. eripiunt cumulantque oneratis lancibus aras.
  16. At vero Rutulis inpar ea pugna videri
  17. iamdudum et vario misceri pectora motu;
  18. tum magis, ut propius cernunt non viribus aequis.
  19. Adiuvat incessu tacito progressus et aram
  20. suppliciter venerans demisso lumine Turnus