Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Procedit legio Ausonidum, pilataque plenis
  2. agmina se fundunt portis. Hinc Troïus omnis
  3. Tyrrhenusque ruit variis exercitus armis,
  4. haud secus instructi ferro, quam si aspera Martis
  5. pugna vocet; nec non mediis in milibus ipsi
  6. ductores auro volitant ostroque decori,
  7. et genus Assaraci Mnestheus et fortis Asilas
  8. et Messapus equum domitor, Neptunia proles.
  9. Utque dato signo spatia in sua quisque recessit,
  10. defigunt tellure hastas et scuta reclinant.
  11. Tum studio effusae matres et volgus inermum
  12. invalidique senes turris ac tecta domorum
  13. obsedere, alii portis sublimibus adstant.
  14. At Iuno e summo, qui nunc Albanus habetur,
  15. tum neque nomen erat nec honos aut gloria monti,
  16. prospiciens tumulo campum aspectabat et ambas
  17. Laurentum Troumque acies urbemque Latini.
  18. Extemplo Turni sic est adfata sororem
  19. diva deam, stagnis quae fluminibusque sonoris
  20. praesidet (hunc illi rex aetheris altus honorem