Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. ad terram defluxit equis; tum talia fatur:
  2. Turne, sui merito siqua est fiducia forti,
  3. audeo et Aeneadum promitto occurrere turmae
  4. solaque Tyrrhenos equites ire obvia contra.
  5. Me sine prima manu temptare pericula belli
  6. tu pedes ad muros subsiste et moenia serva.
  7. Turnus ad haec, oculos horrenda in virgine fixus:
  8. O decus Italiae virgo, quas dicere grates
  9. quasve referre parem? Sed nunc, est omnia quando
  10. iste animus supra, mecum partire laborem.
  11. Aeneas, ut fama fidem missique reportant
  12. exploratores, equitum levia improbus arma
  13. praemisit, quaterent campos; ipse ardua montis
  14. per deserta iugo superans adventat ad urbem.
  15. Furta paro belli convexo in tramite silvae,
  16. ut bivias armato obsidam milite fauces.
  17. Tu Tyrrhenum equitem conlatis excipe signis;
  18. tecum acer Messapus erit turmaeque Latinae
  19. Tiburtique manus, ducis et tu concipe curam.
  20. Sic ait, et paribus Messapum in proelia dictis