Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. illi armis in regna ruunt. Nec plura locutus
  2. corripuit sese et tectis citus extulit altis.
  3. Tu, Voluse, armari Volscorum edice maniplos,
  4. duc, ait, et Rutulos. Equitem Messapus in armis
  5. et cum fratre Coras latis diffundite campis.
  6. Pars aditus urbis firmet turrisque capessat,
  7. cetera, qua iusso, mecum manus inferat arma.
  8. Ilicet in muros tota discurritur urbe.
  9. Consilium ipse pater et magna incepta Latinus
  10. deserit ac tristi turbatus tempore differt
  11. multaque se incusat, qui non adceperit ultro
  12. Dardanium Aenean generumque adsciverit urbi.
  13. Praefodiunt alii portas aut saxa sudesque
  14. subvectant. Bello dat signum rauca cruentum
  15. bucina. Tum muros varia cinxere corona
  16. matronae puerique: vocat labor ultimus omnis.
  17. Nec non ad templum summasque ad Palladis arces
  18. subvehitur magna matrum regina caterva
  19. dona ferens, iuxtaque comes Lavinia virgo,
  20. causa mali tanti, oculos deiecta decoros.