Aeneid
Virgil
Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.
- Cui Liger:
- Non Diomedis equos nec currum cernis Achillis
- aut Phrygiae campos: nunc belli finis et aevi
- his dabitur terris. Vesano talia late
- dicta volant Ligeri. Sed non et Troïus heros
- dicta parat contra: iaculum nam torquet in hostem.
- Lucagus ut pronus pendens in verbera telo
- admonuit biiugos, proiecto dum pede laevo
- aptet se pugnae, subit oras hasta per imas
- fulgentis clipei, tum laevum perforat inguen:
- excussus curru moribundus volvitur arvis.
- Quem pius Aeneas dictis adfatur amaris:
- Lucage, nulla tuos currus fuga segnis equorum
- prodidit aut vanae vertere ex hostibus umbrae:
- ipse rotis saliens iuga deseris. Haec ita fatus
- arripuit biiugos; frater tendebat inertis
- infelix palmas, curru delapsus eodem:
- Per te, per qui te talem genuere parentes,
- vir Troiane, sine hanc animam et miserere precantis.
- Pluribus oranti Aeneas: Haud talia dudum