Georgics

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Palladia gaudent silva vivacis olivae.
  2. Indicio est tractu surgens oleaster eodem
  3. plurimus et strati bacis silvestribus agri.
  4. At quae pinguis humus dulcique uligine laeta,
  5. quique frequens herbis et fertilis ubere campus—
  6. qualem saepe cava montis convalle solemus
  7. despicere; huc summis liquuntur rupibus amnes
  8. felicemque trahunt limum—quique editus austro
  9. et filicem curvis invisam pascit aratris:
  10. hic tibi praevalidas olim multoque fluentis
  11. sufficiet Baccho vitis, hic fertilis uvae,
  12. hic laticis, qualem pateris libamus et auro,
  13. inflavit cum pinguis ebur Tyrrhenus ad aras,
  14. lancibus et pandis fumantia reddimus exta.
  15. Sin armenta magis studium vitulosque tueri
  16. aut ovium fetum aut urentis culta capellas,
  17. saltus et saturi petito longinqua Tarenti
  18. et qualem infelix amisit Mantua campum,
  19. pascentem niveos herboso flumine cycnos;
  20. non liquidi gregibus fontes, non gramina deerunt;