Elegiae
Tibullus
Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.
- Non ego divitias patrum fructusque requiro,
- Quos tulit antiquo condita messis avo:
- Parva seges satis est, satis requiescere lecto
- Si licet et solito membra levare toro.
- Quam iuvat inmites ventos audire cubantem
- Et dominam tenero continuisse sinu
- Aut, gelidas hibernus aquas cum fuderit Auster,
- Securum somnos igne iuvante sequi.
- Hoc mihi contingat. Sit dives iure, furorem
- Qui maris et tristes ferre potest pluvias.
- O quantum est auri pereat potiusque smaragdi,
- Quam fleat ob nostras ulla puella vias.
- Te bellare decet terra, Messalla, marique,
- Ut domus hostiles praeferat exuvias;
- Me retinent vinctum formosae vincla puellae,
- Et sedeo duras ianitor ante fores.
- Non ego laudari curo, mea Delia; tecum
- Dum modo sim, quaeso segnis inersque vocer.
- Te spectem, suprema mihi cum venerit hora,
- Te teneam moriens deficiente manu.