Elegiae
Propertius, Sextus
Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.
- fontis egens erro circaque sonantia lymphis;
- et caua succepto flumine palma sat est.
- audistisne aliquem, tergo qui sustulit orbem?
- ille ego sum: Alciden terra recepta uocat.
- quis facta Herculeae non audit fortia clauae
- et numquam ad uastas irrita tela feras,
- atque uni Stygias homini luxisse tenebras?
- accipit: haec fesso uix mihi terra patet.
- quodsi Iunoni sacrum faceretis amarae,
- non clausisset aquas ipsa nouerca suas.
- sin aliquem uultusque meus saetaeque leonis
- terrent et Libyco sole perusta coma,
- idem ego Sidonia feci seruilia palla
- officia et Lydo pensa diurna colo,
- mollis et hirsutum cepit mihi fascia pectus,
- et manibus duris apta puella fui.’
- talibus Alcides; at talibus alma sacerdos
- puniceo canas stamine uincta comas:
- ‘parce oculis, hospes, lucoque abscede uerendo;
- cede agedum et tuta limina linque fuga.