Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. Amphitryoniades qua tempestate iuuencos
  2. egerat a stabulis, o Erythea, tuis,
  3. uenit ad inuictos pecorosa Palatia montis,
  4. et statuit fessos fessus et ipse boues,
  5. qua Velabra suo stagnabant flumine quoque
  6. nauta per urbanas uelificabat aquas.
  7. sed non infido manserunt hospite Caco
  8. incolumes: furto polluit ille Iouem.
  9. incola Cacus erat, metuendo raptor ab antro,
  10. per tria partitos qui dabat ora sonos.
  11. hic, ne certa forent manifestae signa rapinae,
  12. auersos cauda traxit in antra boues,
  13. nec sine teste deo: furem sonuere iuuenci,
  14. furis et implacidas diruit ira fores.
  15. Maenalio iacuit pulsus tria tempora ramo
  16. Cacus, et Alcides sic ait: ‘ite, boues,
  17. Herculis ite boues, nostrae labor ultime clauae,
  18. bis mihi quaesitae, bis mea praeda, boues,
  19. aruaque mugitu sancite Bouaria longo:
  20. nobile erit Romae pascua uestra Forum.’