Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. turpis in arcana sonuit cum rixa taberna;
  2. si sine me, famae non sine labe meae.
  3. spectaclum ipsa sedens primo temone pependit,
  4. ausa per impuros frena mouere locos.
  5. serica nam taceo uulsi carpenta nepotis
  6. atque armillatos colla Molossa canis,
  7. qui dabit immundae uenalia fata saginae,
  8. uincet ubi erasas barba pudenda genas.
  9. cum fieret nostro totiens iniuria lecto,
  10. mutato uolui castra mouere toro.
  11. Phyllis Auentinae quaedam est uicina Dianae,
  12. sobria grata parum: cum bibit, omne decet.
  13. altera Tarpeios est inter Teia lucos,
  14. candida, sed potae non satis unus erit.
  15. his ego constitui noctem lenire uocatis,
  16. et Venere ignota furta nouare mea.
  17. unus erat tribus in secreta lectulus herba.
  18. quaeris concubitus? inter utramque fui.
  19. Lygdamus ad cyathos, uitrique aestiua supellex
  20. et Methymnaei Graeca saliua meri.