Elegiae
Propertius, Sextus
Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.
- quid mirum in patrios Scyllam saeuisse capillos,
- candidaque in saeuos inguina uersa canis?
- prodita quid mirum fraterni cornua monstri,
- cum patuit lecto stamine torta uia?
- quantum ego sum Ausoniis crimen factura puellis,
- improba uirgineo lecta ministra foco!
- Pallados exstinctos si quis mirabitur ignis,
- ignoscat: lacrimis spargitur ara meis.
- cras, ut rumor ait, tota potabitur urbe:
- tu cape spinosi rorida terga iugi.
- lubrica tota uia est et perfida: quippe tacentis
- fallaci celat limite semper aquas.
- o utinam magicae nossem cantamina Musae!
- haec quoque formoso lingua tulisset opem.