Elegiae
Propertius, Sextus
Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.
- diceris et macie uultum tenuasse: sed opto
- e desiderio sit color iste meo.
- at mihi cum noctes induxit uesper amaras,
- si qua relicta iacent, osculor arma tua;
- tum queror in toto non sidere pallia lecto,
- lucis et auctores non dare carmen auis.
- noctibus hibernis castrensia pensa laboro
- et Tyria in clauos uellera secta tuos;
- et disco, qua parte fluat uincendus Araxes,
- quot sine aqua Parthus milia currat equus;
- cogor et e tabula pictos ediscere mundos,
- qualis et haec docti sit positura dei,
- quae tellus sit lenta gelu, quae putris ab aestu,
- uentus in Italiam qui bene uela ferat.