Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. nunc intra muros pastoris bucina lenti
  2. cantat, et in uestris ossibus arua metunt.
  3. forte super portae dux Veiens astitit arcem
  4. colloquiumque sua fretus ab urbe dedit:
  5. dumque aries murum cornu pulsabat aeno,
  6. uinea qua ductum longa tegebat opus,
  7. Cossus ait forti melius concurrere campo.
  8. nec mora fit, plano sistit uterque gradum.
  9. di Latias iuuere manus, desecta Tolumni
  10. ceruix Romanos sanguine lauit equos.
  11. Claudius a Rheno traiectos arcuit hostis,
  12. Belgica cum uasti parma relata ducis
  13. Virdomari. genus hic Rheno iactabat ab ipso,
  14. mobilis e rectis fundere gaesa rotis.
  15. illi ut uirgatis iaculans it ab agmine bracis
  16. torquis ab incisa decidit unca gula.
  17. nunc spolia in templo tria condita: causa Feretri,
  18. omine quod certo dux ferit ense ducem;
  19. seu quia uicta suis umeris haec arma ferebant,
  20. hinc Feretri dictast ara superba Iovis.