Elegiae
Propertius, Sextus
Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.
- idem Agamemnoniae ferrum ceruice puellae
- tinxit, et Atrides uela cruenta dedit;
- nec rediere tamen Danai: tu diruta fletum
- supprime et Euboicos respice, Troia, sinus!
- Nauplius ultores sub noctem porrigit ignis,
- et natat exuuiis Graecia pressa suis.
- uictor Oiliade, rape nunc et dilige uatem,
- quam uetat auelli ueste Minerua sua!
- hactenus historiae: nunc ad tua deuehar astra;
- incipe tu lacrimis aequus adesse nouis.
- Vmbria te notis antiqua Penatibus edit—
- mentior? an patriae tangitur ora tuae?—
- qua nebulosa cauo rorat Meuania campo,
- et lacus aestiuis intepet Vmber aquis,
- scandentisque Asis consurgit uertice murus,
- murus ab ingenio notior ille tuo.
- ossaque legisti non illa aetate legenda
- patris et in tenuis cogeris ipse lares:
- nam tua cum multi uersarent rura iuuenci,
- abstulit excultas pertica tristis opes.