Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. cum tibi Romano dominas in honore secures
  2. et liceat medio ponere iura foro;
  3. vel tibi Medorum pugnacis ire per hastas,
  4. atque onerare tuam fixa per arma domum;
  5. et tibi ad effectum vires det Caesar, et omni
  6. tempore tam faciles insinuentur opes;
  7. parcis et in tenuis humilem te colligis umbras:
  8. velorum plenos subtrahis ipse sinus.
  9. crede mihi, magnos aequabunt ista Camillos
  10. iudicia, et venies tu quoque in ora virum.
  11. non ego velifera tumidum mare findo carina:
  12. tota sub exiguo flumine nostra morast.
  13. non flebo in cineres arcem sedisse paternos
  14. Cadmi, nec semper proelia clade pari;
  15. nec referam Scaeas et Pergama, Apollinis arces,
  16. et Danaum decimo vere redisse rates,
  17. moenia cum Graio Neptunia pressit aratro
  18. victor Palladiae ligneus artis equus.
  19. inter Callimachi sat erit placuisse libellos
  20. et cecinisse modis, Coe+ poeta, tuis.