Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. non hinc ulla tibi sperandast fama, Properti:
  2. mollia sunt parvis prata terenda rotis;
  3. ut tuus in scamno iactetur saepe libellus,
  4. quem legat exspectans sola puella virum.
  5. cur tua praescriptos evectast pagina gyros?
  6. non est ingenii cumba gravanda tui.
  7. alter remus aquas alter tibi radat harenas,
  8. tutus eris: medio maxima turba marist.'
  9. dixerat, et plectro sedem mihi monstrat eburno,
  10. quo nova muscoso semita facta solost.
  11. hic erat affixis viridis spelunca lapillis,
  12. pendebantque cavis tympana pumicibus,
  13. orgia Musarum et Sileni patris imago
  14. fictilis et calami, Pan Tegeaee, tui;
  15. et Veneris dominae volucres, mea turba, columbae
  16. tingunt Gorgoneo punica rostra lacu;
  17. diversaeque novem sortitae iura Puellae
  18. exercent teneras in sua dona manus:
  19. haec hederas legit in thyrsos, haec carmina nervis
  20. aptat, at illa manu texit utraque rosam.