Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. ah quotiens pulchros vulsit regina capillos,
  2. molliaque immitis fixit in ora manus!
  3. ah quotiens famulam pensis oneravit iniquis,
  4. et caput in dura ponere iussit humo!
  5. saepe illam immundis passast habitare tenebris,
  6. vilem ieiunae saepe negavit aquam.
  7. Iuppiter, Antiopae nusquam succurris habenti
  8. tot mala? corrumpit dura catena manus.
  9. si deus es, tibi turpe tuam servire puellam:
  10. invocet Antiope quem nisi vincta Iovem?
  11. sola tamen, quaecumque aderant in corpore vires,
  12. regalis manicas rupit utraque manu.
  13. inde Cithaeronis timido pede currit in arces.
  14. nox erat, et sparso triste cubile gelu.
  15. saepe vago Asopi sonitu permota fluentis
  16. credebat dominae pone venire pedes.
  17. et durum Zethum et lacrimis Amphiona mollem
  18. expertast stabulis mater abacta suis.
  19. ac veluti, magnos cum ponunt aequora motus,
  20. Eurus et adversus desinit ire Noto,