Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. pulverulentaque ad extremas stat femina metas,
  2. et patitur duro vulnera pancratio:
  3. nunc ligat ad caestum gaudentia bracchia loris,
  4. missile nunc disci pondus in orbe rotat,
  5. et modo Taygeti, crinis aspersa pruina,
  6. sectatur patrios per iuga longa canes:
  7. gyrum pulsat equis, niveum latus ense revincit,
  8. virgineumque cavo protegit aere caput,
  9. qualis Amazonidum nudatis bellica mammis
  10. Thermodontiacis turba lavatur aquis;
  11. qualis et Eurotae Pollux et Castor harenis,
  12. hic victor pugnis, ille futurus equis,
  13. inter quos Helene nudis capere arma papillis
  14. fertur nec fratres erubuisse deos.