Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. et certamen habent leti, quae viva sequatur
  2. coniugium: pudor est non licuisse mori.
  3. ardent victrices et flammae pectora praebent,
  4. imponuntque suis ora perusta viris.
  5. hoc genus infidum nuptarum, hic nulla puella
  6. nec fida Euadne nec pia Penelope.
  7. felix agrestum quondam pacata iuventus,
  8. divitiae quorum messis et arbor erant!
  9. illis munus erat decussa Cydonia ramo,
  10. et dare puniceis plena canistra rubis,
  11. nunc violas tondere manu, nunc mixta referre
  12. lilia vimineos lucida per calathos,
  13. et portare suis vestitas frondibus uvas
  14. aut variam plumae versicoloris avem.
  15. his tum blanditiis furtiva per antra puellae
  16. oscula silvicolis empta dedere viris.
  17. hinnulei pellis stratos operibat amantes,
  18. altaque nativo creverat herba toro,