Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. Quaeritis, unde avidis nox sit pretiosa puellis,
  2. et Venere exhaustae damna querantur opes.
  3. certa quidem tantis causa et manifesta ruinis:
  4. luxuriae nimium libera facta viast.
  5. Inda cavis aurum mittit formica metallis,
  6. et venit e Rubro concha Erycina salo,
  7. et Tyros ostrinos praebet Cadmea colores,
  8. cinnamon et multi pistor odoris Arabs.
  9. haec etiam clausas expugnant arma pudicas
  10. quaeque gerunt fastus, Icarioti, tuos.
  11. matrona incedit census induta nepotum
  12. et spolia opprobrii nostra per ora trahit.
  13. nullast poscendi, nullast reverentia dandi,
  14. aut si quast, pretio tollitur ipsa mora.
  15. felix Eois lex funeris una maritis,
  16. quos Aurora suis rubra colorat equis!
  17. namque ubi mortifero iactast fax ultima lecto,
  18. uxorum fusis stat pia turba comis,
  19. et certamen habent leti, quae viva sequatur
  20. coniugium: pudor est non licuisse mori.