Elegiae
Propertius, Sextus
Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.
- Colchis flagrantis adamantina sub iuga tauros
- egit et armigera proelia sevit humo,
- custodisque feros clausit serpentis hiatus,
- iret ut Aesonias aurea lana domos.
- ausa ferox ab equo quondam oppugnare sagittis
- Maeotis Danaum Penthesilea rates;
- aurea cui postquam nudavit cassida frontem,
- vicit victorem candida forma virum.
- Omphale in tantum formae processit honorem,
- Lydia Gygaeo tincta puella lacu,
- ut, qui pacato statuisset in orbe columnas,
- tam dura traheret mollia pensa manu.
- Persarum statuit Babylona Semiramis urbem,
- ut solidum cocto tolleret aggere opus,
- et duo in adversum mitti per moenia currus
- nec possent tacto stringere ab axe latus;
- duxit et Euphraten medium, quam condidit, arcis,
- iussit et imperio subdere Bactra caput.
- nam quid ego heroas, quid raptem in crimina divos?
- Iuppiter infamat seque suamque domum.