Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. duxit et Euphraten medium, quam condidit, arcis,
  2. iussit et imperio subdere Bactra caput.
  3. nam quid ego heroas, quid raptem in crimina divos?
  4. Iuppiter infamat seque suamque domum.
  5. quid, modo quae nostris opprobria nexerit armis,
  6. et, famulos inter femina trita suos,
  7. coniugii obsceni pretium Romana poposcit
  8. moenia et addictos in sua regna Patres?
  9. noxia Alexandria, dolis aptissima tellus,
  10. et totiens nostro Memphi cruenta malo,
  11. tris ubi Pompeio detraxit harena triumphos—
  12. tollet nulla dies hanc tibi, Roma, notam.