Elegiae
Propertius, Sextus
Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.
- Quid mirare, meam si versat femina vitam
- et trahit addictum sub sua iura virum,
- criminaque ignavi capitis mihi turpia fingis,
- quod nequeam fracto rumpere vincla iugo?
- ventorum melius praesagit navita morem,
- vulneribus didicit miles habere metum.
- ista ego praeterita iactavi verba iuventa:
- tu nunc exemplo disce timere meo.
- Colchis flagrantis adamantina sub iuga tauros
- egit et armigera proelia sevit humo,
- custodisque feros clausit serpentis hiatus,
- iret ut Aesonias aurea lana domos.