Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. mendaces ludunt flatus in amore secundi:
  2. si qua venit sero, magna ruina venit.
  3. tu tamen interea, quamvis te diligat illa,
  4. in tacito cohibe gaudia clausa sinu.
  5. namque in armore suo semper sua maxima cuique
  6. nescio quo pacto verba nocere solent.
  7. quamvis te persaepe vocet, semel ire memento:
  8. invidiam quod habet, non solet esse diu.
  9. at si saecla forent antiquis grata puellis,
  10. essem ego quod nunc tu: tempore vincor ego.
  11. non tamen ista meos mutabunt saecula mores:
  12. unus quisque sua noverit ire via.