Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. ipse Paris nuda fertur periisse Lacaena,
  2. cum Menelaeo surgeret e thalamo;
  3. nudus et Endymion Phoebi cepisse sororem
  4. dicitur et nudae concubuisse deae.
  5. quod si pertendens animo vestita cubaris,
  6. scissa veste meas experiere manus:
  7. quin etiam, si me ulterius provexerit ira,
  8. ostendes matri bracchia laesa tuae.
  9. necdum inclinatae prohibent te ludere mammae:
  10. viderit haec, si quam iam peperisse pudet.
  11. dum nos fata sinunt, oculos satiemus amore:
  12. nox tibi longa venit, nec reditura dies.